Бақыт деген – Қатира Жәленова

Керек-ақ қой үміттің өшпегені,
Кейде бақыт адамға кеш келеді.
Қайта оралдың,
Кешіккен көктемім боп,
О, тілемен,
Енді өзге ештеңені!
Жанарыңа сүңгіген кезде батып,
Қуаныштан тізермін көзге жақұт.
Бақыт деген,
Жаным-ау,
Мына сен ғой,
Қайтем тілеп
Тағдырдан өзге бақыт?!
Жасыл мамық,
Торғынын үлбіреткен,
Тұнды келіп
Жанарға нұрлы көктем.
Бақыт деген,
Жаным-ау,
Мына мен ғой
Сезім болып кеудеңде дір-дір еткен!
Нұр құяды көңілге тұнық аспан,
Ғашықтардың,
Алла-ай,
Әр күні дастан...
Бақыт деген
Ол – мына екеуіміз ғой
Бір-біріне риясыз сырын ашқан!