Тәуелсіздік — арманы бар қазақтың – Сайын Назарбекұлы

Бұл бетте «Тәуелсіздік — арманы бар қазақтың» атты Сайын Назарбекұлы жазған тәуелсіздік туралы өлең берілген.

  • 07.06.2022
  • 0
  • 0
  • 1438
Суарылған аталар арманына,
Сан ғасырдың жаншылған салмағына —
Өліп-өшіп, қартайып, қайта туып,
Тәуелсіздік оралды ел маңына.
Не зұлматқа аталар төзе білді,
(О, Жаратқан! Бердің бе кезек енді!).
Ержеткізші, қарындас аялашы,
Бүгін туған өбектеп, бөбегіңді.
Ол — арманның үлкені, "кәрі кісі",
Тек Алладан басқаның бәрі кіші.
Атаң осы, сәлем бер басыңды иіп,
Сәл кенжелеу туғаны — тәңір ісі.
Ол — арманы бар қазақ ары бүтін,
Ол — мақсаты, жаңғылы, жарығы түн.
Азап ұмыт, ол жолда өлген шейіт,
Артады елің тек саған бар үмітін.
Еңбек етші, жолына — Тәуелсіздік!
Байлық жина, жолына — Тәуелсіздік!
Бірақ, бәрі босына — ең алдымен,
Рухыңды алмасаң — тәуелсіз ғып!

28.02.1993 ж.


Пікір қалдырыңыз

Пікірлер (0)

Осы автордың басқа өлеңдері