Не керек?

Жоқ кезiмде бермей
Бар кезiмде бергенiң
Не керек?
Тар кезiмде көрмей
Нар кезiмде көргенiң
Не керек?
Не керек?
Жыртылған қайықтай
Тозғанымда
Демемей,
Кемедей озғанымда
Демегенiң не керек?
Қайырылған шегедей
Болғанымда
Жебемей,
Жебедей атылғанымда
Жебегенiң не керек?
Не керек?
Бар кезiмде сұрамай
Жоқ кезiмде
Өтiнiп сұрағаның
Не керек?
Тiрiмде жерге тығып,
Өлгенiмде
Өкiрiп жылағаның
Не керек?
Не керек?

---