Маскүнем

Арақты –
Көк теңiзде жүзгендей! –
Жүзiп iштi.
Албастыдай арқырап,
Жын сияқты бұрқырап
Қызып iштi.
Шөлден кенезесi кепкендей
Жұтынып iштi.
Сабалақ жүндi сайтандай
Құтырып iштi.
Арын арбап iштi
Жанын жалдап iштi.
Теректей тiп-тiк азамат
Қисалаңдап
Теңселiп кеттi.
Таудай биiк азамат
Шөмейiп
Жер шөгiп кеттi.
Қылыштай өткiр,
Құрыштай берiк жiгiтiм –
Былжыраған! –
Бiр шайнам
Сағызға айналды.
Қыпшақ пен
Оғыздың ұрпағы,
Қорқыттай зарлы
Қобыздың ұрпағы,
Асанқайғыдай
Абыздың ұрпағы, –
Дөңкиiп
Шалшықта жататын
Доңызға айналды.