Саған

Бұқадай басыңды шайқап
Жұлқынып тұрғаныңа қарап,
Ұмтылып тұрғаныңа қарап
Қорқатын едiм.
Жарып тастай ма деп
Аяғымды тартатын едiм, –
Ұқтым:
Мүйiзiң
Киiз боп шықты.
Күнге шағылысып
Жарқырап тұрғаныңа қарап
Кемел деп ойлап ем,
Терең деп ойлап ем, –
Ұқтым:
Тобықтан келмейтiн
Тайыз боп шықтың.
Талтайып тұрғаныңа қарап
Тұлғаңа тоймайтын едiм.
Жартас деп ойлайтын едiм, –
Ұқтым:
Жүн толтырған
Қанар боп шықтың.

---