Тозақты қазақ көп көрдi

Тозақты қазақ көп көрдi.
Бастарынан
Зұлматтан
Зұлмат өткердi.
Тiрiдей отқа қақтады.
Күлге аунатып таптады.
Әзiрейiлдер жерiме
Сұқтанып
Сұғынып алды.
Жендет қолдарын
Кеуделерiне тығып жiберiп
Шыбын жандарын –
Шырқыратып! –
Суырып алды.
Қоңыраулы гүрзiлерiн шулатып
Мүңкiр-нәңкүрлер
Төбесiн ойды,
Маңдайын жарды.
Сорғалаған қанын
Сораптап iшiп қанды.
Таудың үстiне
Тас арқалатып айдады –
Азапқа салды.
Отқа шыжғырды,
Тозаққа салды.
Көз жасын,
Бұршақтай төккiздi.
Қылдай көпiрден өткiздi.
Уа, жаратқан ием!
Қасiреттi
Көп көрген елiме
Мәртебе, мерей бер.
Мейiрiмiңдi төгiп,
Рахымыңды түсiрiп
Желеп-жебей гөр!
Әумин.