Әріптері де қару-жарақтай – Темірхан Медетбек

Көк түрiктер жазбалары,
Көк түрiктер әрiптерi –
Қандай айбатты едi,
Қандай қайратты едi.
Жер үстiнде жоқ
Iрiлiк неткен!
Жазуларын –
Қара тастарға
Сiңiрiп кеткен.
Бiр әрiптерi
Шашақты найзадай үшкiр.
Бiр әрiптерi
Көбе сөгетiн –
Қозы жауырынды! –
Жебедей ұшқыр.
Бiреулерi
Еменнiң бұтағынан иiлген
Адырнадай керiлiп тұр.
Бiреулерi –
Тастың iшiнде! –
Тұлпардың тұяғындай
Тебiнiп тұр...
Бiреуi
Қалқанның шеңберiндей
Бiреуi
Тасты бүрiп тұрған! –
Бүркiттiң шеңгелiндей.
Бiреуi
Ту көтеретiн сырықтай.
Бiреуi
Асау ұстайтын құрықтай.
Бiреуi –
Неткен тәкәппар! –
шалқайып тұр.
Бiреуi –
Қиып түсемiн деп! –
Қылыштай қайқайып тұр.
Осының бәрi –
Бiз үшiн! –
Тәлiм, сабақтай:
Көк түрiктердiң –
Әрiптерi де! –
Елiн қорғайтын
Қару-жарақтай!