Көктемгі сурет

Түнімен жауған жаңбырдан
Дүние салбырап,
Басылып қалыпты...
Жердегі шалшықтар —
Жыртып- жыртып тастаған
Фотосуреттер секілді, –
Жапырақ- жапырақ боп,–
Шашылып қалыпты.
Жапырақ- жапырақ
Шалшықтың біреуінде
Төңкерілген аспан
Тұнып жатыр;
Біреуінде
Селтиіп тұрған
Шыбық жатыр;
Біреуінде
Бұтақта бүрісіп отырған
Торғай тұр;
Біреуінен
Тоқтап тұрған
Машинаның бейнесі көрінеді;
Біреуінен
Керілген жіптен алынбай қалған
Әлдекімнің жейдесі көрінеді.
...Бұлт түріліп
Аспанның бір шеті
Ашылып жатыр...
Жапырақ- жапырақ шалшықтар
Жыртылған фотосуреттер құсап
Қара жердің бетінде
Шашылып жатыр.