Тіршілік не боп барады? – Темірхан Медетбек

Кереметпіз деп
Аузымызды айға білесек те,
Өмірдің иманды болмысы
Алға жүрмеді,
Алға баспады...
Қансонарда екі аңшы
“Менің оғым тиді” деп,
« Жоқ, менің оғым тиді” деп
Сұлап жатқан қоянға таласып
Бірін- бірі атып тастады...
Сұмдықтар
Жайлады не түрлі:
Бір жерде
Анасы баласынан безіп,
Бір жерде
Баласы әкесін өлтірді...
Бүгінде арманың солып,
Үмітің сөніп тұр...
...Әне бір полицей
Аязда қатып қалған
Бомжының қалтасынан
Шылым алып шегіп тұр...
Өзенің суалып,
Өзегің күтірлеп сынуда...
...Айдаладағы екі әйел
“Бұл–
Менің сиырымның жапасы” ,
“Жоқ,бұл –
Менің сиырымның жапасы” деп
Кеуіп қалған тезекке таласып
Бір- бірінің шашын жұлуда!..
Тіршілік не боп барады?!