Құбылыстар мен бұрылыстар

Құбылыстары мен
Бұрылыстары көп
Заман бұл.
Шиыр-шиыр
Құбылыстарына
Шырматылып
Қамалдым.
Жықпыл-жықпыл
Бұрылыстарында
Тоналдым...
Шиыр-шиыр
Құбылыстарының
Шырғалаңын-ай.
Жықпыл-жықпыл
Бұрылыстарының
Бұралаңын-ай.
Тапсаңшы,
Бір амалын-ай!..
Шым-шытырық
Құбылыстардан
Қап – қара бәле шығып
Үстіме төніп
Түйіліп тұр ғой.
Жықпыл-жықпыл
Бұрылыстардан
Құтырған құйын шығып
Жіптей есіп
Иіріп тұр ғой.
Үстіме төнген
Сол бәле иісінен
Құрт түскен еттей
Бұзылып кетердеймін.
Ұршықтай
Құтырып айналған
Қара құйыннан
Үзіліп кетердеймін.
Шиыр-шиыр
Шырматылған
Құбылыстардан
Шыға алар емеспін.
Жықпыл-жықпыл
Қара құйынды
Бұрылыстарды
Ұға алар емеспін.
Мен қазір
Сұлба мен елеспін!

---