Ауа райы – Темірхан Медетбек

Долы бір жел
Түс-әлпеті
Әлемтапырық
Қан-сөлсіз бұлттарды
Алдына сап
Қуып келеді.
... Біліп тұрмын:
Әне-міне дегенше
Елімнің ішіне
Жансыздай сумаңдап
Суық кіреді.
Жұлым-жұлым болған
Мына бір ағаш
Кеп-кеше ғана
Көк өрім еді...
... Қазір-ақ
Әне бір жақтан
Үскірік аязды
Циклондар шығып,
Басқа бір жақтан
Оларға қарсы
Алау-далау боп
Антициклондар
Көтеріледі.
Сарыарқаның үстін
Сапырып
Сыпырып жатқан
Ақ түтек боранның
Сұрапылын-ай,–
Алып даланың
Шөп пенен бұталарын
Бастарын жерге тигізіп
Еңретіп жылатуын-ай.
Көл менен теңіздерім
Арналарына
Сия алмай
Бұрқ-сарқ қайнап
Аласұруда.
Манағы долы жел
Келген бұлттарды
Қаңбақ құрлы еөрмей
Алатаудан
Әрі асыруда...
Қабағынан қар жауған
Аспан әлемі
Бұйыққан тірлікке
Түйіліп қарады...
... Әйтеуір бүгінде
Ауа райы да
Қысастық көрген
Жан дүниесіндей
Аласапыран боп
Бүлініп барады...