Кең залында Кремльдің – Тайыр Жароков

Коммунист партиясы —
деген атты
Ең құрмет тұтып
бастан ел ұнатты!
Ғасырлар шыңдарынан көктей өтіп
Бастады ол —
алға бүкіл адамзатты.
Езілген елді өрлете тың ғасырға,
Шығарып миллиондарды ірі асуға
Халықтар бақытының
шыңы болған
Бесігі —
бұл партия —
Россия!
Партия,—
ылғи алға басқан қадам,
Күні жоқ жеңіске елін бастамаған!
Өсірген әкем де — сол,
анам да — сол!
Еш уақта,
мені, артқа тастамаған.
Тағы да —
кең залында Кремльдің
Бас қосқан —
коммунистер жүрегінің
Сеземін соғуынан коммунизм
Шыңына жолын сызған
Ұлы елімнің!

1956