Мен Октябрь ұлымын – Тайыр Жароков

Қараңғы ащы тұрмыстан,
Қиындық көріп ығысқан,
Құл боп, күң боп жалынып,
Бай табына туыстан.
Тұрғанда қор боп, Октябрь
Таңы атқан шығыстан.
Мен Октябрь ұлымын.
Борсық қысып жанымды,
Сүліктей сорып қанымды,
Тек мен емес езді ғой,
Еңбекші, жалшы табымды,
Табыммен мені теңелткен
Октябрь атқан таңымды,
Мен Октябрь ұлымын.
Екпінді еңбек дуым бар,
Жер жаңғыртқан шуым бар,
Атқан оққа құламас,
Қырмызы қызыл туым бар,
Күлкім күндей, бұрқансам
— Тас балқытар буым бар.
Мен Октябрь ұлымын.
Нашарды бұрын көретін
Қолым ұшын беретін;
Коммунизм ұрығын
Еңбекші елге себетін,
Кедейшіл коминтерннің
Туы астында жүретін,
Мен Октябрь ұлымын.

1928