Жалған дүние – Гүлмекен Қасенбай

Қызыл түлкі секілді əттең дүние,
Салып қойдың пендеңді нендей күйге?
Саған қолы жеткендер - кердең қағып,
Айналаға қарауда мұрын шүйіре...
Расында ғажапсың-ау, жалған дүние!

Опа бермес тіріге қайран байлық,
Сенен жақсы мың есе иман, саулық.
Саған құл боп үлгерген пенделерге,
Жаным ашып, тілеймін тек амандық.

Қызғыштай ғып қорғаған қызыл дүние,
Түсірген пенделерді талай күйге.
Қайдан келді? Кім берді?- деп ойламай,
Садақа да бермейді, байғұс пенде.

Жаман-ақ, ақша​ буы​ - тасытады,
Ақшасы аз біреуді​ - жасытады.
Дүниені сүюден сақта Раббым,
Кірдің суы жүректі​ сасытады!

Берсең тек адал мал бер, берекелі,
Бергім келеді өзгеге мен де оны.
Жалғыз өзім бай болсам жарамайды,
Аш отырса айналам, туыс-көрші...!

22.06.2018