...ға

Айыпқа бұйырмассыз жазғанға хат,
Тартпақтап, жатырқарлық емеспіз жат,
Көңіл ашар ләззатпен сөз жазысып,
Сізден басқа жоқ болды білер бекзат.
Болса да сізден басқа көп сәулемдер,
Хат жазып, мұсылманша оқу білер.
Бірақ аз сізден өзге ғылымдысы,
Зер жайын зергер білер көңілі шебер.
Жобамен жаздым сізде бар деп зейін,
«Сыйға сый, сыраға бал» дегендейін,
Жылы сөз қайырсаңыз бір-екі ауыз,
Жазар ем көңіл сырын бұдан кейін.
Жақсы қыз кісі көңілін қалдырмаған,
Адамға ішкі сырын алдырмаған.
Миуасың гүл бақшада желкілдеген,
Ешкімге құрғақ көңіл шалдырмаған.