Сағыну

Сарғайдым сағынғаннан, қалқаш, сені,
Қиял мен ойдың саған ауып дені.
Қайғыда, қасіретте мен жүргенде,
Ойға алмай жүр ме екенсің әлде мені?
Сен де мені сағынып жүр ме екенсің?
Я тіпті қасіреттен құр ма екенсің?
Сағынып мен тұнжырап отырғанда,
Әлде ойнап біреуменен жүр ме екенсің?
Сенен жақын дүниеде маған жан жоқ.
Жырақта жүрсем-дағы көңіліме тоқ,
Жүрегім күйді, жанды, сені ойлай,
Ішіме түскендей-ақ қып-қызыл шоқ.
Мәлімсіз тағдырымыз жалғыз хақта.
Бөліндік ойда жоқта жастық шақта.
Өлгенше менің көңілім жалғыз сенде,
Жүрсең де сен ол жақта, мен бұл жақта.

---