Надан бай – Сәкен Сейфуллин

Мың жылқы, мың қойым бар бір басымда,
Қызықты көріп бақтым бұл жасымда.
Бір аяқ саумал үшін малай болған
Қараша үй қоңсым бар көп қасымда.
Орысша оқыр кей ақымақ теріс жазып
Тымақ кимей, қалпақ киіп жөннен азып,
Оқымаған адамдарды надан дейді,
Орысша оқып, діннен азып, хаққа жазып.
Малайларға ақы берем жылдап, айлап,
Қотыр-қатпа, арық-тұрақ, тайынша-тайлап
Балаларым оқымай-ақ адам боп жүр,
Maл шашпай-ақ оқу үшін молда сайлап.
Мал бақтырмай балаларын оқытқанның
Еш пайдасын таппадым ойлап-ойлап.
Кісі жақсы малын өзі бағатұғын,
Ақсақ-тоқсақ, ауруларын қағатұғын.
Оқу оқып, һәм орысша киінеді,
«Пиғылы» жоқ бір құдайға жағатұғын!