Айт күні – Сәкен Сейфуллин

Тоқшылық бүгінгі күн берекелі,
Көңілді ойын-күлкі мерекелі.
Әр адам өз әлінше айт қылып жүр,
Дүниенің сезілгендей кең екені.
Талғамай жақсы-жаман, кәрі-жасын,
Бай-кедей, бөтен-жақын ayылдасын.
Әр мүһмин күтетін күн келгендерді
Құрметпен алдарына жайыпасын.
Жiгіттер қатар түзеп, сәндік құрып,
Айттайтын күн жиналып бірге жүріп.
Аралап әр ауылдан көкпар алып,
Аттары екіленіп аласұрып.
Аттарын секеңдетіп кейбір жастар,
Жұлынып кейбір аттар алып қашар.
Елеңдеп кейбір аттар сау аяңдап,
Keй аттар алды-артынан ақсап басар.
Болған соң айт асымен аузын ашып,
Жиылып қыз-келіншек хабарласып,
Олар да айттайтын күн әр ауылды
Тізіліп, қайтқан қаздай дуылдасып.
Бұлғақтап үкілері бастарында,
Сылдырлап шолпылары шаштарында,
Судырлап шөпті сипап етектері,
Шүпірлеп уақ қыздар қастарында.
Жүгірер қуанысып балалар да,
Ойнаған лақ-қозыдай биік жарда.
Асыр сап құлындары сүтке тойған
Тайлардай енелерін емген арда.