Жаныңдамын – Айгүл Қадыр

Қызғалдағы жоқ қырлардан,
Сағынышы жоқ мұңдардан,
Сезімнен ада жырлардан,
Айтылмай қалған сырлардан
Сен мені енді іздеме!
Арайы күңгірт таңдардан,
Өзенсіз, шатқал, аңғардан,
Таулары тұман заңғардан,
Мейірімі аздау жандардан
Сен мені мүлдем іздеме!
Жазылмай қалған хаттан да,
Көңілсіз өткен шақтан да,
Базары тарқаған бақтан да.
Жана алмаған шоқтан да
Сен мені тіпті іздеме!
Сәуірі сұрғылт көктемде,
Толассыз жауын төккенде,
Сұрықсыз күндер өткенде,
Іздеуден азап шеккенде
Шарқ ұрып мені іздеме!
Мен сенің жаныңдамын!
Айгүл Қадыр