Қанатты Қазақстан

Қазақстаным – қанаттым,
Жайдарлы шуақ жанаттым.
Құрыштай құйма алтыны
Азаттық атты сабақтың!
Қазақстаным – асқағым,
Жүрегімдегі басты әнім.
Тұңғиық, тұнық тереңім,
Мөп-мөлдір ашық аспаным!
Қазақстаным – ән-жырым,
Абайым менен Жамбылым.
Байқоңыр баспалдақтары
Ғарышқа тартқан даңғылым.
Қазақстаным – расым,
Жеті орар жерді құлашың.
Кермиық, кербез Мұхтарым,
Көмейі бұлбұл Күләшім.
Қазақстаным – қыраным,
Мәңгілік айтар ұраным.
Болашағымды байқатып,
Жарқырап жанған шырағым.
Қазақстаным – елдігім,
Тәуелсіздігім, теңдігім.
Өлшеуге өрең жетсеші
Кемеңгер елдің кеңдігін.
Қазақстаным – айбарлым,
Атыңнан әсем айналдым.
Кере бір қарыс маңдайлым,
Бақыттың кені – қайнарлым.
Қазақстаным – қазақтың
Алдынан шыққан азат күн.
Дана кезі сенсің қазақтың,
Аға кезі сенсің қазақтың.
Қазақстаным – ардағым,
Жерұйық мекен арманым.
Достықтың құрып отауын,
Он сан жұрт қонған ордалым.
Қазақстаным – жарығым,
Қаныштай дана дарыным.
Әлиям және Мәншүгім,
Бауыржан менен Мәлігім.
Қазақстаным – думаным,
Анадан бірге туғаным.
«Сарыарқа» болып селдеген
Күйіңді күй боп тыңдадым.
Қазақстаным – көріктім,
Ерке еткен мені еріктім.
Шырқалса «Қазақ вальсі»,
Әніңе ән боп еліттім.
Қазақстаным – Ар туым,
Шадыман шаттық шалқуым.
Олжастың орман ойлары –
Ғаламға тартқан тартуым.
Қазақстаным – ақ таңым,
Мың ғасыр іздеп тапқаным.
Көкірегің толы асыл жыр,
Жадымда тоқып жаттадым.
Қазақстаным – еңбегім,
Өркендеп, өсіп, өнгенім.
Өрнектеп жазған ер халқым,
Кемеңгер кітап сен бе едің?
Келмеске кетіп азабың,
Артыңда қалды тозағың.
Тәуелсіз тұғыр-тағыңда
Жасай бер мәңгі, қазағым!

---