Салық Зиманов – Қорғанбек Аманжолов

Түлеген Тайсойғаннан тума дарын,
Дарияға айналдырған жылғаларын,
Ағаға академик бас иеміз
Ғылымның алып болған мың қамалын.
Ақылдың озып туған алыбысыз,
Ғылымның шын ғұлама дарынысыз.
Зиманов заман сөзін толғағанда –
Зиялы бар қауымның қазығысыз.
Биіндей баяғының жосыласыз,
Алаштың абызындай асыл жансыз.
Әлихан, Ахмет, Әлкей, Қаныштардай
Тобына алыптардың қосыласыз.
Асылдан тұяқ болып қалғаны – сіз,
Ғылымда шырақ болып жанғаны – сіз.
Даланың даналығын ұлықтаған
Заң мен замананың заңғарысыз.
Ұлттың да намыс-арын жібермейсіз,
Елдіктің шаңырағына тіреудейсіз.
Адами қасиетпен, абзал аға,
Алашқа ақ баталы тілеудейсіз.
Әрқашан жүгінетін арға ғана,
Беретін әділдікпен барға баға.
Тұғырың тоқсандағы берік болып,
Жасай бер Алатаудай заңғар аға!