Рас

Бір әмірдің, бір тәңірдің бары рас,
Сол Тәңірі жазғанынан жаңылмас.
Содан басқа,
Пайғамбар да, пенде де –
Еш құдірет жан оты боп жағылмас.
Сүйген құлға ұят берген, ар берген,
Амал берген алып шығар тар жерден.
Дермене күй дерттендірген шақтарда
Дәрмен етер дауасы мол дәркермен.
Сол Тәңірдің тоқсан тоғыз аты бар,
Адамзатқа Құран Кәрім хаты бар.
Аян оған миыңдағы мың сан ой,
Аллаң өзі қалт еткізбей бақылар.
Сол Тәңірі адамзатты сүйеді,
Мейірімі нұрдай балқып иеді.
Рахманынан, Рахымынан құр қалмай,
Жұмсақ жүрек жұтар кәусар киені.
Үкім, кесім – бәрі соның қолында.
Зауал, жаза – Сүмбіленің шоғында.
Әзәзіл сұм арбағанға ерсең де,
Шырмалсаң да ібілістің торында.
Көк тұманда көңіл дерті жоғалар,
Сүйген құлда сүйе білер сана бар.
Ақиреттің ақ таңында, ақыры,
Адасқандар Алласына оралар.
Ақирет те, қиямет те – бәрі рас,
Арсыдағы Хақ Тағала бары рас.
Қара тасы Қаһбаның, саған серт,
Қара тілім кәлимадан жаңылмас.
Ұлық нұрға ұйып тұрған бар ғалам,
Айналайын әділетті Алладан.
Аяныңмен аялашы жанымды,
Адастырмас қыбылаңды бер маған.

---