Темір жол толғауы

Айдында заулағандай күміс қайық,
Темір жол тегеурінін нық ұстайық.
Болашақ ғасырларға самғасын деп,
Батасын берген екен Тынышбаев.
Жырлаған “Отарба” деп Сері Сәкен,
Жүйткіген қара айғырдай өрісі кең,
Болат жол белдеулеген байтағымның
Барар жер, басар тауы алыс екен.
Тартылған төсайылдай темір табан,
Өзіңнен өркені өскен өмір табам.
Түрксіб туғанында Мағжан ақын
Мұңданып, жалын атып, жабырқаған.
Болат жол бодан елді шырмағандай,
Шаттығын, сақарасын ұрлағандай.
Отарба тарсылынан тақуалар
Ойнағын жын-шайтанның тыңдағандай.
Отарба Отарды асқан, Шуды басқан,
Болғандай боз көделі, мұңды дастан.
Жайнатпай жазирасын қазағымның,
Жайлаған ашаршылық күнге ұласқан.
Тар кезең, тағы талай заман өткен,
Кірпікте көз жасындай нала кепкен.
Болат жол – боздақтарын алашымның
Батыста бір тозаққа ала кеткен.
Составтар көп әкетіп, аз әкелген,
Көріңді кейбіреулер қаза келген.
Тоғытқан миллиондап тыңгерлерден
Туған жер тозаңданып, наза көрген.
Қос табан – қос ішегі домбыраның,
Күйлерін көкейіме қондырамын.
Темір жол табанында жатқан тарих,
Қоздатып қоламтасын жандырамын.
Болат жол жарасады бостан елге,
Бәйгеге бозайғырын қосқан елге.
Торабы тоғыз жолдың тоқсан тарау,
Айбыны Алатаудан асқан елге.
Арсыдан күш алғандай арқар аспан,
Аруағын асырғандай алты алаштан,
Абылай - азат елдің тұғырында,
Екінші Алматыда қақпаны ашқан.
Қақпасы - Қазақстан темір жолы,
Болғандай болашаққа өмір жолы.
Сәлем ап сегіз қиыр, шартарапқа,
Сомдалған шын жүректен көңіл жолы.
Бұрымдай жетелеген қыз арманын,
Жолымнан үмітімді үзе алмадым.
Өмірдің күйін шерткен қос ішектен,
Тілеймін осы жолдың ұзарғанын.

---