Қайда кетіп барамыз

Жан-жарым-ау, қайда жүрміз, қайда кетіп барамыз,
Тұман басқан күн секілді тұмшаланды санамыз.
Бойға қуат, жанға медет қайдан іздеп табамыз?
Кеше ғана көңіліміз көл, жайлау еді жағамыз.
Күніміз той арқа-жарқа, жұмақ еді түніміз,
Ұмытып та барамыз ба бірімізді-біріміз.
Сиынарың мен едім де, қиыларым сен едің.
Қандай болып бара жатыр тұрпатымыз, түріміз?
Бірде тасып, бірде жасып қайда кетіп барамыз?
Арып-ашып шаршадық па, алқына дем аламыз.
Сен біреудің қызы едің, мен біреудің ұлы едім,
Бізді әкелген бұл өмірге қайда ата-анамыз?
Біздер үшін отқа түскен қайда ата-анамыз?
Егілгенде еске түсіп үнсіз, тілсіз қаламыз.
Опасы жоқ дүниеге күйінеміз, наламыз,
Опасы жоқ дүниені қайда арқалап барамыз?
Опа берер дүниені қайдан іздеп табамыз.

---