Бара алмаған жолдар бар, барғым келер – Жадыра Байбұланова

Бара алмаған жолдар бар, барғым келер,
Тама алмаған жанарда жаңбыр да өлер…
Адамдар көп, байқаймын, айналамда —
Амандықтан аспайды әңгімелер…

Қол бермесем — қалды дер құлашты аяп,
Жақсы десем жағдайым, растай-ақ!
Жан болса ғой, хат жазып жіберетін,
Аман-саулық, күн райын сұраспай-ақ…

Менің жалғыз жағдайым, дертім — жүрек,
Жақсымын деп, жүректі өлтірдім көп.
Өлең жазып отырмын хат орнына,
Босап қалған кеудені толтырғым кеп.

Көре алатын жан таппай жанарсыз да,
Көнді көңіл ызғарға, санам — сызға.
Ал адам көп…
Адам көп айналамда:
— Сәлеметсіз?
— Қалайсыз?
— Амансыз ба?