Күмісжан

Атыңнан айналайын Күміс деген,
Күншуақ ажарыңнан тыныс көрем.
Оңалды көңіл көркі бір өзіңмен,
Оралды құт, береке ырыспенен.

Қайырмасы:
Ақ күмісім балқыған,
Аққуымсың шалқыған.
Жеткен асыл арманға
Қорғап өтер жалғанда,
Мен боламын сақ қыран.

Күлкіңнен сездім жылы Күн шуағын,
Ашылды ажарыңнан нұрлы сағым.
Сен барда сенімім мол болашаққа,
Заңғарға қиядағы бір шығамын.

Қайырмасы

Қалайша махаббатсыз жүрсін адам,
Сарқылмас шаттығымды білсін ғалам.
Көздеген зор мереке сен туған күн,
Өзгеден артық екен бір сыбағам.

Қайырмасы