Алтынжан

Алтынжанды аяла алтын әнім,
Ата дәстүр сыйлағыш салты мәлім.
Қыз баладай иіліп тәжім етсе,
Көрдік талай ақсақал шалқығанын.

Қайырмасы:
Алтынжан...
Төрдің көркі сәні де.
Жанға дәру әні де.
Не тілесең табылар,
Тал бойынан бәрі де.

Биіктетсе жан жарын көтермелеп,
Ағайынға қиналған етер көмек.
Ақ дастархан жайғанда дос-жаранға,
Шат күлкісі жүректі өтер бөлеп.

Қайырмасы

Шашылғандай ақ сәуле шар айнадан,
Ақ дидары маңайын арайлаған.
Алтынжанды бір көру – алтын дәурен,
Нұр жұмақта жүрмін деп санайды адам.

Қайырмасы