Домбыра – Кәкімбек Салықов

Дүлдүл досым тірлікті бірге кешкен,
Үздігемін үніңе сыр бөліскен.
Реніште тілдестім екі ішекпен,
Қуанышты қақ бөлдім үндеместен.

Қайырмасы:
Көрік берген далама,
Серік болған данама.
Асан қайғы, Қорқыттың,
Күйін құйған санама.
Шертіп, қағып тамсантқан,
Сені ұстауды аңсатқан,
Алғыс айтам бабама.
Бір өзіңсің домбырам,
Ата мирас мол мұрам
Тастап кетер балама.

Күмбіріңде жылқының дүбірі бар,
Лебіңде жан қалқа сыбыры бар,
«Сарыарқа» мен «Саржайлау» құйқылжыса,
Тыңдаған жан Қазақтың сырын ұғар.

Қайырмасы

Су жорғадай домбырам, құбыласың,
Сонда маған өзіңдей кім ұнасын.
Жер шарына жеткіздің ән төресін,
Ел көргенде дербестік шұғыласын.

Қайырмасы