Біз екеуміз

1. Жігіт:
Қайтқан қаздай,
Жұпты жазбай.
Бақыт құсы
Қонған жандай,
Сен де ғашық болып ең.
Дәмі балдай,
Құмар қанбай,
Қыр соңынан
Қыздың қалмай,
Мен де ғашық болып ем.

2. Қыз:
Сықылықтап,
Сылқым бұлақ.
Құшағыңа
Құрбың құлап,
Сен де ғашық болып ең.
Өрт боп жанып,
Естен танып.
Көрместей боп,
Көңіл қалып
Мен де ғашық болып ем.

3. Жігіт:
Адастырып,
Таластырып.
Жүректерді
Жарастырып,
Сен де ғашық болып ең.
Ай өтерін,
Жыл жетерін.
Білмей ғұмыр
Зу етерін,
Мен де ғашық болып ем.

4. Қыз:
Күйем деп те,
Сүйем деп те.
Басқа бақыт
Үйем деп те
Сен де ғашық болып ең.
Алдағанға,
Арбағанға.
Көнбей ешбір
Басқа жанға,
Мен де ғашық болып ем.

5. Қыз бен жігіт:
Сән болсын деп,
Ән болсын деп.
Мына өмірде
Мән болсын деп,
Сен де, мен де ғашықпыз.
Сүйдірмеген,
Бүлдірмеген,
Махаббатқа
Күйдірмеген
Ғұмыр жалған ғашықсыз.
А-а-а...........
Гүл өмірге, бұл өмірге,
Біз екеуміз ғашықпыз.
Ән өмірге, сән өмірге,
Біз екеуміз ғашықпыз.