Ағалар

Ағайым асқар алдымда,
Қадірі қымбат қауымға.
Мейірі күндей түсетін
Қарындас пен бауырға.
Қорғаным менің панам сол,
Ақылы дария данам сол.
Өмірі үлгі, өнеге
Атымтай-Жомарт ағам сол.
Ағасыз өскен інілер,
Қабағынан-ақ білінер.
Ағасы барлар қашан да
Алдымен көзге көрінер.
Таудан да биік ірілер
Пайғамбар тұлға пірілер.
Ағасы аман жүргенде
Мақтанбас қалай інілер.
Ағасыз тойым болмайды,
Ағасыз ортам толмайды.
Ағасыз жүрген бір күнім,
Жүдетпей жанды қоймайды.
Жарқырап құндыз жағалар,
Алдымда жүргей ағалар,
Өздерің барда өмірде
Менің де күнім, бағам бар.