Сарыбел жазы – Сәдуақас Томашинов

Сарыбел жазы жайлы, қысы қарлы,
Есілі ерке өзен биік жарлы.
Тоғыз жол торабында құтты мекен,
Ұл-қызы жеріне сай мейірманды.

Қайырмасы:
Сарыбел жарқын жамалың,
Ажарын ашқан даланың.
Нияздың тауы сендегі,
Қазаққа қорған қамалың.
Әр тасы мирас,
Ұрпағы қимас,
Көзіндей батыр бабаның.
Кетпейді естен,
Есілден ескен,
Жұпар жел, салқын самалың.

«Арқада Абылай аспас Сарыбелім»,
Аталмай атың ұмыт қалып едің.
Таңымен тәуелсіздік тарих түлеп,
Табысып қуанады қалың елің.

Қайырмасы

Сарыбел сайын далаң сары бидай,
Ырысың асып-тасып жатыр сыймай.
Елу ұлт етегіңде бауыр басқан,
Сағынған алыс кетсе сені қимай.

Қайырмасы