Өртеніп өз отыма – Сейіт Қадыр

Өртеніп өз отыма шала пісіп,
Отырмын шарасыздан шарап ішіп.
Дүние түлкі болып бұлаңдайды,
Жолымды кес-кестейді қара мысық.

Жанымды жазықсыздан жала қысып,
Басымнан бақыт құсы бара ма ұшып?
Жеткізбей өз қолымды өз ауызыма,
Жалайды несібемді қара күшік.

Қайырмасы:
О-о-о-о-у, дүние-ай,
Жеткізбей өз қолымды өз ауызыма,
Жалайды несібемді қара күшік.

Заманның тап болмайды тезіне кім,
Мүлт кетсем мәңгілікке көз ілермін.
Жапалақ жалбаңдаса жар басында,
Боларын бір сұмдықтың сезінемін.

Білсем де бір қырсықтың кезігерін,
Қалайша мен өзімнен безінермін?
Өмірім илеп мені, жүн қып түтіп,
Тағдырым тағар бір күн өзіме мін.

Қайырмасы:
О-о-о-о-у, дүние-ай,
Өмірім илеп мені, жүн қып түтіп,
Тағдырым тағар бір күн өзіме мін.