Бағбан сыры

Емен,
Қайың,
Ақ терек –
Бәріне де бап керек.
Отырғызсаң алмаағаш,
Тамырына тап қорек.

Назар салып әр түпке,
Келтір бақты тәртіпке.
Бағбан болсаң,
Шалжиып
Жатып алу артық де!

Қашырып та,
Қуып та,
Пәлекетті жуытпа!
Түтін қойып,
Әр түпті
Сақтау керек суықта!

Биологтың, қарағым,
Білесің бе талабын?!
Әр ағаштың сәуірде
Әктеу керек балағын.

Жердің қара құйқасы –
Жас тамырдың шипасы,
Қопсытасың әр түпті,
Көктемеде қи тасып.

Сияқты бір ата-анам
Қарт бағбаннан бата алам.
Жеміс ағаш әдетте
Болу керек жатаған.

Бөлер күн мен көп түнін
Бізде солай жоқ, тыным.
Күзеу керек жыл сайын
Жеміс ағаш шоқтығын.

Ақырында, қыраным,
Көреді көз қырағы.
Бағың менен Еңбегің
Қатар гүлдеп тұрады!