Келінге тілек

Келініме

Келін келді,
Құт кірді есігімнен.
Әлдилейтін үйімді бесігімен.
Уа, Жаратқан! Өзіңе жалбарынам...
Сақтай көргін, Әзәзіл кесірінен!

Келін келді,
Бақ келді шаңырағыма!
Ұрпағымды қорғай гөр, Жалғыз Алла.
Бірге көріп өмірдің бар қызығын,
Үлгі болсын екеуі ұрпағына!

Келін келді,
Нұр шашып иманымен.
Анасынан сіңірген ибасымен.
Күңгірт әлем еріксіз балқығандай -
Ол әкелген махаббат жылуымен!

Келін келді,
Ұлымды таңдап мәңгі.
Қобалжып тұр, қорқып тұр, жат қой бәрі..
Жүрек шіркін атқақтап қуаныштан,
Екі көзден бақыттың жасы ағады..

Қуаныш қой, қалайша жыламайын?
Келер күнге қалай бақ сұрамайын?
Уа, Әл-Хамид мақтаулы, сыйлы қылып,
Келінімді бақытты жан қылғайсың!

Тең қартайсын екеуі ұзақ жасап,
Шөберенің қолынан құрт-май асап.
Мен секілді келінге бата беріп -
Риза боп отырсын көңілі босап!

Гүлмекен Қасенбай
03.02.2025

---