Ұмыту қиын, білемін – Айгүл Қадыр

Ұмыту қиын, білемін,
Санамда сансыз естелік.
Бақытқа толы сәттер бар,
Оларды енді не істедік?!

Келмей ме әсте өшіргің,
Менің де бәрі жадымда.
Бір күні, мүмкін, айналар,
Сағымға, бәрі сағымға.

Сабырға көнер ет жүрек,
Өмірдің өзі бірер сын.
Ұйқымды менің мың бөліп,
Түсіме, бәлкім, кірерсің.

Көңілге түйдік бос арман,
Қиялдан жасап тас қамал.
Алайық түсті мекендеп,
Таппасақ енді басқа амал.

Ұмытып сен де көр мені,
Өзінен мұңның тап жігер.
Жаныңды жесе сағыныш,
Жай ғана маған хат жібер.
Айгүл Қадыр