Тағы да таң атты – Ерлан Ахмет

Тағы да бір күннің таңы атты,
Жылытып бүр жарған сабақты.
Қаншама құстарды оятты,
Арайы аралап алапты.

Тағы да бір күннің таңы атты,
Балғын шөп сипалап балақты.
Қаншама тіршілік нәр алды,
Көтеріп сусаған сағақты.

Тағы да бір күннің таңы атты,
Түрткілеп тыншыған манатты.
Таулардың аңғарын түнеген
Қаншама жолаушы қолатты.

Тағы да бір күннің таңы атты,
Алтын Күн сәулесін таратты.
Қаншама періште-сәбиді
Жаратқан жар болып жаратты?!

Тағы да бір күннің таңы атты,
Баянды мың күнге балатты.
Қаншама жандарға нұр құйып,
Аштырған түйілген қабақты.

Тағы да бір күннің таңы атты,
Арманның сатысын санатты.
Қаншама үмітке от жағып,
Таудай ғып береді талапты?!

Тағы да бір күннің таңы атты,
Ілгері жылжытып сағатты.
Қаншама тағдырды сынайды,
Түгесіп болғанша тағатты?!

Тағы да бір күннің таңы атты,
Адамзат жанарын қаратты.
Қаншама шаңырақ шаттанар,
Толтырып ырысқа табақты?!

Тағы да бір күннің таңы атты,
Атқарар әрбір іс - жауапты.
Қаншама пендеге бұйырар
Айыру күнә мен сауапты?!.

Тағы да көп күннің таңы атсын -
Алладан тілерім, қалап шын.
Әділдік әмірлік орнатсын,
Адалдық шуағын таратсын!