Күзгі көрініс – Гүлмекен Қасенбай

Күзгі көрініс

Алтын жапырақ
ағаштан ұшып түсті де,
Қызыл бояудан азырақ жағып үстіне.
Қол ұстасып ап,
Айнала кетті дөңгелей.
Жапырақтарменен танго билемек үйіріле!

Қуанып бәрі, шаттанып әнге салады,
Самал жел келіп үрлесе ұшып-қонады.
Сыбырласады, қуаласады
Содан соң,
Таса жер көрсе тырп етпей үнсіз жатады.

Мизам шуақтың қызуын алып Жер-Ана,
Көйлегін киді қызыл да жасыл, сары-ала.
Суық та емес, ыстық та емес, жып-жылы,
Қыркүйек айы, айнала қандай тамаша!

Тиіндер ойнап, жаңғақ тасып жүр ініне,
Мысық пен кірпі бірге ас жеп жүр күніге.
Борсық пен суыр, қоңыр аюлар қоңданып,
Ұйқыға терең дайындалуда үңгірде.

Алтын күз қандай керемет еді шуақты,
Тырналар ұшты бетке алып ыстық аймақты.
Сүмбіле түссе ертең-ақ суып кетеді,
Уақытша ғана жылымық сәттер тұрақсыз!

Гүлмекен Қасенбайқызы
02.10.2025