Күз

Күз

Сары желек жамылып,
Алтыннан сырға тағынып.
Қоңыр күз келді тағы да,
Елімді мынау сағынып.

Сыйы да оның мол сондай,
Астығы алтын маржандай.
Алма, алмұрт, жүзім, шабдалы,
Жеміс әкелді алуадай.

Қап-қап боп сәбіз, картоптар,
Асқабақ, пияз, шалқандар.
Ұраға кетті қыстауға,
Абайла, үсітіп алмаңдар!

Балдыркөк, желкен, сарымсақ,
Қызанақ, қияр, қырыққабат.
Ащы әрі тәтті бұрыштар.
Қазанға түсті уыстап.

Ыстықтай булап құтыны,
Анашым салат жабады.
Береке екен күз деген,
Қарасаң көзің тояды.

Жем-шөп те малға даяр тұр,
Жаз бойы жиған мая бұл.
Құрт-майын апам қаппенен,
Шоланға сақтап қояды.

Алтын күз - байлық, береке,
Молшылық, шаттық, мереке.
Қазақ еліне бақ дарып -
Гүлдене берсін әр өлке!

Гүлмекен Қасенбайқызы
02.10.2025 жыл.

---