Әке мен бала айтысы – Гүлмекен Қасенбай

(Сахнаға Бауыржан домбыра тартып, бір ән айтып шығады. Әннің екі-үш жолы айтылған соң, әкесі сахнаның сыртында тұрып "Бауыржан" - деп екі-үш рет айқайлайды. Бауыржан домбырасын қойып, "ау-әке!"-деп жауап береді. Әкесі сахнаға шығып, былай дейді.)

Нұрбол:
- Айқайлап жатырмын мен "Бауыржан" - деп,
Ән айтып сен отырсың "ау әке!" - леп.
Әкесі шақырғанда шықпайтындай,
Білгім келеді ұстаған сені не деп?

Бауыржан:
- Әкешім ренжімеңіз ашуланып,
Сайысқа қатыспақшы Бауыржаның!
Көпбосын немересі Нұрболұлы -
Дегенде шықпаймын ба әнімді айтып?
Руым - Албан, ішінде Сары, Тайлақ,
Баламын еркін өскен күліп-ойнап!
Арайдай жан анашым өмірге әкеп,
Зылиха әжем өсірген мені аялап!

Нұрбол:
- "Жігіттің сұлтанына" қатысуға,
Жүрмісің дайындалып ей сен бала?
Жарайсың отыра бер әніңді айтып,
Жарыста жеңілуді ойыңа алма!

Бауыржан:
- Қазақпын "жарыс" десе жанып түсер,
Сегіз "И" сыныбым бар жеңіс күтер.
Макеева Бибігүл апайым бар,
Анамдай біздер үшін күйіп-пісер!
Сонша жанның үмітін мойныма алып,
Келген соң бар өнерді салам анық!
Әділқазы алқасы, жиналған көп -
Сәлемімді қоярсыздар қабыл алып!