Өлең, жыр, ақындар

Сұлукөл

  • 07.02.2016
  • 0
  • 0
  • 2763
Көрінген інжу-маржан түбіндегі,
Арқаның шар айнадай Сұлукөлі.
Қызғанып қызғыш байғұс шыр айналып,
Құшақтап сүйген шығар бұрын сені.
Көп жайды кейінгіге ұғындырған,
Келесің көне ертектей бұрынғыдан.
Жаутаңдап жас құралай шаңқай түсте,
Еңкейіп ішкен шығар тұнығыңнан.
Қырыңда қасқыр аулап қақпан құрып,
Қыранын томағалы баптандырып.
Селт етіп сері жаны әлде біреу,
Жағаңда жатқан болар ат шалдырып.
Ол да емес, ойлағаным менің бірақ,
Суылдап сыр ұрлама селдір құрақ.
Сұлудың көз жасынан құралды ма,
Әуелде таудан шығып мөлдір бұлақ.
Көп аңыз көлге батып жойылғандай,
Көп заман келе жатыр ой ұға алмай.
Көз жасы сұлулардың көп тамған соң,
Аты оның Сұлукөл деп қойылғандай.
1957



Пікірлер (0)

Пікір қалдырыңыз

Үкілі

  • 0
  • 0

Үкілі, тау біткейнен аласасың,
Үйілген алаңқайра ала тасың.
Үкілі, қыз секілді ертедегі,
Үйіріп жолаушыны қаратасың.

Толық

Орал, 1942 жыл

  • 0
  • 0

Тоқталатын кезі жетті жаңбырдың,
Ашық күнді енді саған қалдырдым.
Эшелондар, эшелондар зулайды,
Күйін шертіп тартыстағы тағдырдың.

Толық

Алматының алтын отты түндері

  • 0
  • 0

Кім жастықта қадіріңді білмеді,
Кім қойныңда алшаң басып жүрмеді.
Жасыл баққа, жас құшаққа шақырған,
Алматының алтын отты түндері.

Толық

Қарап көріңіз