Қызғалдағым

Қияда еркін өскен қызғалдағым,
Тағдыры қимастық қой қыз баланың.
Елжіреп, езіліп тұр ет жүрегім,
Қия алмай жанарыңнан көз алмадым.

Аттадың жат жұрттың ақ босағасын,
Гүлім-ау, көңілің еш босамасын.
Барасың жаңа ұяңа қанат қағып,
Қуантып екі елдің қос анасын.

Ақ құсым, сыңсып ұшқан көлімдегі,
Мөп-мөлдір жас тұнады көңілде енді.
Қарағым, қабағыңды мұң шалмасын,
Бақытың серік болсын өмірдегі.

Қол бұлғап қоштастың сен ұяңмен,
Еркемді енді жатқа қиямын мен?
Құсым ең айдынымда қалықтаған,
Айдыным сенсіз қалай тұнар екен?

Автор: Оразбай Сарыбаев