Гүлдер мерекесінде

Гүлдің бүгін қонағы,
Керме иықты жеңгейлер.
Көтерілді жоғары,
Кере құлаш кернейлер.
Қарт тәжіктер жыр жырлап,
Кернейлерді ойнады.
Қақты бірі ұрғылап,
Дүңкілдетіп дойраны.
Ашылды гүл пердесі,
Ашылды гүл көрмесі.
Толқын болып тербелді,
Театрдың бөлмесі.
Жиналыпты бас құрап,
Таулы өлкенің гүлдері.
Қызыл, сары, ақшыл, ақ...
Гүлдің барлық түрлері.
Бірі алтынның буындай,
Бірі күннің нұрындай.
Түскен көктен мөлдіреп,
Бірі бұлттың суындай.
Бірі нәзік балдырған,
Бірі сондай сүйкімді.
Өткендей көз алдыңнан,
Жас сұлулар сиқырлы.
Жеңгейлер гүл айдынын
Көздерімен жүзіп жүр.
Сүйді таудың қай гүлін
Қалды ма ұнап қызыл гүл?
Алғаш аттап жар үйін
Келін болып түскенде;
Алғаш көріп сәбиін,
Шаттық суын ішкенде.
Құттықтаған бірінші,
Мүмкін қызыл гүл болар.
Балқытқандай гүл исі,
Күлімсіреп тұрды олар.

---