Үш сурет

Білетін атағын
Баласы әр үйдің,
Бауыржан атаны
Мен жақсы танимын.
Салдым мен атаның
Отты, өткір көздерін.
Бастағы папағын,
Самсаған орденін.
Содан соң ұсынып,
Суретті атама,
Сұрадым қысылып:
«Ұқсай ма атаға?»
Жасаурап жанары,
Аймалап ол мені:
«Атаңдай, қарағым,
Бақытты бол!» – деді.
Ал біздің ауылда
Бар тағы Бауыржан.
Саспайды дауылда,
Қашпайды ауырдан.
Білемін мән-жайын
Егінші ағайдың.
Айдайды комбаин
Орақта талай күн.
Аралап жүретін
Егістің танабын,
Салдым мен суретін
Қадірлі ағаның.
Содан соң ұсынып
Суретті анама.
Сұрадым қысылып:
«Ұқсай ма ағаға?»
«Жақсы екен талабың», –
Құшақтап ол мені:
«Ағаңдай, қарағым,
Еңбеккер бол!» – деді.
Сөзіне анамның
Қуанып қалдым мен.
Ғарышкер баланың
Суретін салдым мен.
Тіп-тіке иығы,
Көздері қап-қара.
Жарасты киімі
Өзіне шақ қана.
Айналам табанда
Болғандай жап-жарық.
«Бұл кім?» – деп анам да,
Сұрады таң қалып.
«Бұл менмін!
Жас талап,
Кәдімгі Бауыржан,
Кішкентай ғарышкер
Кішкентай ауылдан.
Ұшамын алысқа,
Қайтпайды талабым», –
Дедім мен:
«Марсқа,
Шолпанға барамын!
Самғасам алысқа,
Жайнайды жанарым.
Тоқтар мен Талғаттай
Ғарышкер боламын.
Шарлап бар ғаламды,
Жеріме қонамын.
Ақ ниет адамның
Алғысын аламын!»