Жаға және жең

Таза ғой деп кигенім,
Жүрген күнім шамалы.
Сыртқа шықсам жейдемнің
Жеңдері кір болады.
Көрсетеді кім үлгі,
Назар салып қарашы.
Шаң қонғанда киімнің
Былғанады жағасы.
Кір-қоқысқа жолама,
Жол бойында тап болар.
Таза жүрсең далада,
Жең мен жағаң ақ болар.
«Жағаң таза болсын деп,
Жеңің таза болсын!»- деп,
Айтқан кезде анашың,
Жүрме, қалқам, қол сілтеп.
Жұрт сүйсініп қараған,
Жақсылыққа балаған,
Тазалығы дененің
Көрінеді жағадан.
Түрлі жерге бардың ба,
Үлгі-өнеге алдың ба?
Байқалады жеңіңнен
Тазалығы қолдың да.
Ісін жасап қалаған,
Біріге алса бар адам.
Қол шығады бір жеңнен,
Бас шығады жағадан.