Тіршілік

Шаттанасың, шарпысасың,
Сан қызыққа батасың,
Айтысасың, тартысасың,
Ит татпасты татасың;
Шыға қалса кім айдынға,
Көзбен, сөзбен атасың.
Тағдырдың да, құдайдың да
Шығарасың «қатасын»;
Масайрайсың, мастанасың,
Бір-біріңді сатасың,
Жар құшағын жастанасың,
Көрердей боп опасын,
Заман мынау — кәпір түрі,
Төккен жәбір-жапасын.
Айналып кеп ақыр түбі
Тар қуыста жатасың.