Бір жақсы мен бір жаман

Болған соң өмір бұралаң,
Болады жақсы мен жаман.
Бұл өмірде мен көрген
Сұрасаң, халқым, жазайын
Бір жақсы мен бір жаман.

Бір жақсысы — көп бізде аурухана,
Бір жаманы — бермесең көк қағаздан,
Болмас оның шипасы жанға дауа.
Бір жақсысы — көп бізде көшелер де,
Бір жаманы — тас төселген трассалар,
Көшелер қисық-мисық, шұрық дала.

Бір жақсысы — көп бізде шенеунік те,
Бір жаманы — уәдені үйіп-төгер,
Еліне емес, жақынына болып жаға.
Бір жақсысы — көп бізде ірі қара,
Бір жаманы — қараны бағар жер жоқ,
Сатып бітті өзгеге оны да, аға.

Бір жақсысы — көп бізде баспана да,
Бір жаманы — қазағым тентіреп жүр,
Жалдамалы пәтерде — Астанада.
Бір жақсысы — көп бізде жас жұбайлар,
Бір жаманы — үйі жоқ, күйі жоққа
Қатын болып шыға ма жас қыз бала?

Бір жақсысы — көп бізде базарлар да,
Бір жаманы — қайнаған қымбатшылық,
Айлықтан да қымбаттау жасанды алма.
Бір жақсысы — ұлтпыз біз дінге берік,
Бір жаманы — дүмшелер қаптаған ба?
Дінсіздерден елімді сақташы, Алла!

Бір жақсысы — көп бізде балабақша,
Бір жаманы — келгенше кезек саны,
Ол бала да келеді біраз жасқа.
Бір жақсысы — мектепте жетерліктей,
Бір жаманы — тіл сынбаған балдырғанға
Үш тілді үйретіп жүр шетелдіктей.

Бір жақсысы — газым бар сарқылмайтын,
Бір жаманы — арзанға сыртқа сатып,
Қымбатқа өзім алған жағдайым бар.
Бір жақсысы — таусылмас мұнайым бар,
Бір жаманы — сорып тұр шетелдіктер.
Ойланыңдар, бауырлар, ағайындар!

Шығарылған күні: 04.09.2018 жыл