Әйелдерге ода
Бұл бетте «Әйелдерге ода» атты Ахат Кендебай жазған өлеңнің мәтіні толық жарияланған.
Сұлтандар мен әмірлер гаремдерге жинаған,
Гитлер менен Сталин лагерлерде қинаған.
Арна кеуіп қалмау үшін, ғұмырларды жалғау үшін,
Қара күшке иілгеннен әйел шыбық сынбаған.
Әйел – анам, әйел – жар,
Әйел – өмір жайнаған,
Әйел – серік, әйел – нұр,
Әйел – тірлік қайнаған.
Әйел – шабыт, әйел – гүл,
Әйел – жырдың арқауы.
Әйел – тұғыр, әйел – тақ,
Әйел – бағым таймаған.
Шыңғысхан мен Темірлан жарты әлемді жаулаған,
Сұлулардың құшағына жаһангерлер тоймаған.
Әттең, бірақ, қолда тұрып бар биліктің құрығы,
Бір әйелдің жүрегін де толық жаулай алмаған.
Әйел – мазақ, әйел – пұл,
Жарнамада жалаңаш.
Әйел – олжа, әйел – күң,
Базарларда қарбалас.
Әйел – шарап, әйел – түн,
Көк аттының ермегі.
Әйел – жұмбақ, әйел – кім?
Әйел-көкпар тарқамас.
Дарындардың аспанын бұлт қонып торлаған,
Қырандардың тағдырын шүрегейге байлаған.
Зиялы әлем табынған Толстойдай дананы,
Өз әйелі өмір бойы мойындамай қорлаған.
Әйел – пері, әйел – жын,
Әйел – сұлу арбаған.
Әйел – залым, әйел – сұм,
Әйел – сорым қайнаған.
Әйел – індет, әйел – жұт,
Тамшы суға зар еткен.
Әйел – тағдыр, әйел – құм,
Уысымда тұрмаған.
Қайғы менен қуанышты қатар өріп сыйлаған,
Тағдырымды қиянатқа қалай ғана қия алам.
Аппақ менің арым болған бір әйелді мойындап,
Көкірегіме атын жазып тарихқа мен айналам.
Әйел – қиял, әйел – мұң,
Әйел – шырақ жанбаған.
Әйел – сандық, әйел – сыр,
Әйел – үміт талмаған.
Әйел – намыс, әйел – сын,
Әйел – берік босаға.
Әйел -- өзен, әйел – көл,
Әйел – шөлім қанбаған.
- Азамат Төре
- Азамат Төре
- Али Акбар Деһхода
- Али Акбар Деһхода
Барлық авторлар
Ілмек бойынша іздеу
Мақал-мәтелдер
Қазақша есімдердің тізімі