Күз

Бұл бетте «Күз» атты Ахат Кендебай жазған табиғат туралы өлең берілген.

Тырналар көкте тыраулап,
Қоштасу әнін салады.
Ұшқыны қыстың қылаулап,
Шегіртке бүрсең қағады.

Ағаштар басын шайқаған,
Райын күздің бағады.
Бойдағы нәрін қайтадан,
Тамырға жинап алады.

Сап-сары түсті жапырақ,
Топырақ бетін жабады.
Көк аспан көзі шатынап,
Жылауық болып барады.

Ақ қырау түскен бір түнде,
Гүлдерді үсік шалады.
Үсімей қауыз үрпінде,
Дәндері піскен қалады.

Жаздағы салқын бұлақтар,
Жылытып суын ағады.
Жағасындағы құрақтар,
Сыбырлап мұңын шағады.

Тіршілік түгел қамданып,
Көктемге үміт артады.
Адамдар кейде аң қалып,
Азабын кейін тартады.

P.S.Көктем, жаз, күздің артынан,
Қыстың да келер кезегі.
Бір күні көзді көртұман,
Жабарын ішім сезеді...


Пікір қалдырыңыз

Пікірлер (0)

Осы автордың басқа өлеңдері