Біздің елдің жігіттері

Бұл бетте «Біздің елдің жігіттері» атты Санжар Ғұлама жазған өлеңнің мәтіні толық жарияланған.

Көсілейін мен бүгін көмейімнен жыр төге,
Біздің елдің жігіттері ТЕКТІЛІГІ бір төбе.
Әуелі Алла, содан соң,
Мынау байтақ далаға –
КӨК БӨРІНІҢ ҰРПАҒЫ ҚАЗАҚ дейтін жұрт еге.
Біздің елдің жігіттері – АРЫСТАНДАР азулы,
Қайран, ЕРІМ білмеген қамығумен қажуды.
Тарихы бар тағылымды санасына сақталған,
Жаңғырығы жылдардың жүрегінде жазулы.
Біздің елдің жігіттері –
БАТЫРЛАР ғой, БАТЫРЛАР,
Олар жайлы сыр шертер әлі талай ғасырлар.
Білегінде күш-қайрат сарқылмаған – ЕРЛЕРІМ,
Жүрегінде иманы жарқылдаған – АСЫЛДАР.
Біздің елдің жігіттері – жүрегінде оты бар,
Көрсем ТАУмен елестер биік-биік
ШОҚЫЛАР.
Әрқайсысы өзінше – бір ӘЛЕМ ғой,
Әлі алда
Ел ішінде ЕРЛІГІ жыр-дастан боп оқылар.
Беу, Қазақтың жігіттері ҚЫРАН ҚҰСТАЙ қырағы,
Қыран құсым биікке қалай ұшпай тұрады?!
Мынау Отан – от-жалын, «жарықтардың» шырағы,
Мынау байтақ кең дала – алыптардың тұрағы.
Досты алып құшаққа,
Жау-дұшпанын жайратты,
Таптай алмас ешбір ел – біздер тіккен байрақты.
Мынау елдің мәңгілік иесіне айналған
Жасай берсін ҚАЗАҚТЫҢ ЖІГІТТЕРІ ҚАЙРАТТЫ!


Пікір қалдырыңыз

Пікірлер (0)

Осы автордың басқа өлеңдері