Наурыз-мейрам

Болмасын тек Арудың қабағы мұң,
Жалыны байқалсыншы жанарының.
Мынау Дала сілкінер шағы туды,
Наурыз келіп қалыпты - Жаңа жылың!

Сезіледі тіршілік жұрт қамынан,
Дәстүрін, баба жолын жұрт таныған.
Егін бітік, еліңде ақ мол болсын,
Қазақ та ұлт қой әр кез құт дарыған.

Құттықтасын әркім де тұрғыласын,
Көреміз қашаннан-ақ жырды басым.
Әр үйде ақ дастарқан жайылсын да,
Қазандары қайнатсын сүрдің асын.

Наурыз көже ішілсін мерекеде,
Ұлық тұтқан ұлт соны ел екен де.
Салт-дәстүрі сақталса арда елдің,
Сонда кірер ынтымақ, берекең де.

Оянғандай жақсылық, сенім-үміт,
Қарсы ала ма Наурызын елі күліп.
Сыйластығын білдіріп сұлуларға
"Селт еткізер" жасасын сері жігіт.

Ғашықтарға бөгет жоқ жану барда,
Жетелесін арманы аруды алға.
Сергек болсын серінің сезімі деп,
"Ұйқыашар" дәм ұсынсын арулар да.

Құлпырғандай көктеммен дала бүгін,
Алып бір келгендей-ақ жаңалығын.
Құтты болсын Наурызың есік қаққан,
Құтты болсын, алаш ел, Жаңа жылың.

Болсын әр кез асылдан жиғаның ой,
Ұлыс күнде ұрпаққа сыйладың ой.
Алтыбақан тептірген ғашықтарға
Наурыз деген - Махаббат мейрамы ғой!

---